મોરબીના સેવાભાવી સંગઠનો દ્વારા સમાજના જરૂરિયાતમંદ વર્ગના બાળકોના શિક્ષણ માટે એક પ્રેરણાદાયી પહેલ કરવામાં આવી. મોરબી ન્યૂમિસમેટિક ક્લબ અને સિંગાપોર સ્થિત મિલાપ ફાઉન્ડેશનના સંયુક્ત ઉપક્રમે સામાન્ય પરિવારના જરૂરિયાતમંદ બાળકોને શૈક્ષણિક કીટ તથા પૌષ્ટિક નાસ્તાનું વિતરણ કરવામાં આવ્યું.
આ સેવાકાર્યનો મુખ્ય ઉદ્દેશ બાળકોને શિક્ષણ પ્રત્યે પ્રોત્સાહિત કરવાનો અને તેમના ભણતરમાં આર્થિક અડચણ ન આવે તે સુનિશ્ચિત કરવાનો હતો. મોરબી ખાતે યોજાયેલ આ કાર્યક્રમ દરમિયાન બાળકોને શૈક્ષણિક કીટમાં સ્કૂલ બેગ, નોટબુક અને ચોપડા, કંપાસ બોક્સ, પેન, પેન્સિલ, રબર, ફૂટપટ્ટી, સંચો, એક્ઝામ પેડ, નાસ્તા બોક્સ અને વોટર બોટલ વિતરણ કરવામાં આવ્યું. શૈક્ષણિક કીટની સાથે તમામ બાળકોને પૌષ્ટિક નાસ્તો પણ આપવામાં આવ્યો, જેથી તેઓ ઉત્સાહભેર અભ્યાસ કરી શકે.
આ સેવાયજ્ઞમાં મોરબી ન્યૂમિસમેટિક ક્લબના સંસ્થાપક પ્રમુખ અને જાણીતા એડવોકેટ મિતેષ દવે, એડવોકેટ દર્શન દવે, એડવોકેટ કપિલદેવ પંડ્યા, યુવા લેખક પરમભાઇ જોલાપરા, શાળાના સંચાલક કિશોરભાઈ ફુલતરીયા, શિક્ષક જીગ્નેશભાઈ ત્રિવેદી ખાસ ઉપસ્થિત રહ્યા હતા. તેમની સાથે ક્લબના અન્ય સભ્યો બહોળી સંખ્યામાં જોડાયા હતા.
કાર્યક્રમમાં સંબોધન કરતા મિતેષ દવેએ જણાવ્યું કે, “ન્યૂમિસમેટિક ક્લબ માત્ર ચલણી સિક્કા-નોટના સંગ્રહ પૂરતી સીમિત નથી. અમારો પ્રયાસ સમાજના છેવાડાના બાળક સુધી શિક્ષણ પહોંચાડવાનો છે. ‘શિક્ષા અભિયાન’ અંતર્ગત અમે મિલાપ ફાઉન્ડેશન, સિંગાપોર સાથે મળીને આ પહેલ કરી છે. એક બાળક ભણશે તો એક પરિવારનો વિકાસ થશે અને આગળ જતા રાષ્ટ્રનો વિકાસ થશે.”
મિલાપ ફાઉન્ડેશન, સિંગાપોરનો આભાર માનતા તેમણે કહ્યું કે વિદેશમાં વસતા ભારતીયો પણ પોતાની માતૃભૂમિના બાળકોની ચિંતા કરે છે એ આપણા સૌ માટે ગૌરવની વાત છે.
નવી સ્કૂલ બેગ અને પુસ્તકો મળતાં ગરીબ બાળકોના ચહેરા પર ખુશી સ્પષ્ટપણે જોવા મળી. ઘણા વાલીઓએ આ પહેલને બિરદાવી અને સંસ્થાનો આભાર માન્યો. તેમને જણાવ્યું કે, “મોંઘવારીના સમયમાં બાળકોને ભણાવવા ખૂબ અઘરું છે. આ કીટથી અમને ખૂબ મોટી મદદ મળી છે.”
મોરબી ન્યૂમિસમેટિક ક્લબએ મિતેષ દવે દ્વારા સ્થાપિત આ ક્લબ સૌરાષ્ટ્રની નામાંકિત ન્યૂમિસમેટિક સંસ્થાઓમાંની એક છે. ચલણી નોટ-સિક્કાના સંગ્રહ, સંશોધન અને પ્રદર્શન સાથે ક્લબ સતત સામાજિક કાર્યો પણ કરતી રહે છે. સિંગાપોર સ્થિત મિલાપ ફાઉન્ડેશન વિદેશમાં વસતા ભારતીયો દ્વારા ચલાવવામાં આવે છે અને ભારતમાં શિક્ષણ, આરોગ્ય અને ગૌ-સેવાના ક્ષેત્રે કાર્યરત છે. આ કાર્યક્રમ સફળ બનાવવા માટે મોરબી ન્યૂમિસમેટિક ક્લબના તમામ સભ્યો અને સ્વયંસેવકોએ જહેમત ઉઠાવી હતી. સંસ્થાએ ભવિષ્યમાં પણ આવા વધુ સેવાકીય કાર્યો કરવાની નેમ વ્યક્ત કરી.
