ટંકારાના મિતાણા ગામની સીમમાં તસ્કરોએ હાથફેરો કર્યો હતો. ફલોરોના કારખાનાની ખુલ્લી જગ્યામાં રાખવામાં આવેલા કોપરના કેબલ કોઈ અજાણ્યા શખ્સો ચોરી કરી લઇ ગયા હતા. આ મામલે રાજકોટના વેપારીએ ટંકારા પોલીસ સ્ટેશનમાં ફરિયાદ નોંધાવી છે.
ઘટનાની વિગતો મુજબ, રાજકોટના કાલાવડ રોડ પર રહેતા મુકેશભાઈ નાથાભાઈ ઝાલાવાડીયાની માલિકીના મિતાણા ગામની સીમમાં આવેલા કારખાનાના પરિસરમાં આ ચોરી થઈ હતી. કોઈ અજાણ્યો ચોર ઇસમ કારખાનાની ખુલ્લી જગ્યામાં પ્રવેશ્યો હતો. ત્યાં રાખેલા નાની-મોટી સાઇઝના કોપરના કેબલના ગુંચળા, જેનું અંદાજિત વજન ૧૫૦ કિલોગ્રામ જેટલું હતું, તેની ચોરી કરી નાસી છૂટ્યો હતો. ચોરી થયેલા આ મુદ્દામાલની અંદાજિત કિંમત ૧.૫૦ લાખ જેટલી આંકવામાં આવી છે. ટંકારા પોલીસે આ મામલે અજાણ્યા ચોર વિરુદ્ધ ગુનો નોંધી વધુ તપાસ હાથ ધરી છે.
