યંગ ઇન્ડિયા ગ્રુપ દ્વારા આજથી સુરક્ષિત અને પારિવારિક માહોલમાં ક્રિષ્ના લોકમેળો શરૂ : પ્રવેશ સંપૂર્ણ નિઃશુલ્ક

મોરબી શહેર તેમજ આસપાસના ગ્રામ્ય વિસ્તારોના લોકો પરિવાર સાથે સુરક્ષિત, સ્વચ્છ અને આનંદમય વાતાવરણમાં લોકમેળાનો આનંદ માણી શકે તેવા હેતુથી યંગ ઇન્ડિયા ગ્રુપ દ્વારા દર વર્ષની પરંપરા મુજબ આ વર્ષે પણ ‘ક્રિષ્ના લોકમેળા’નું ભવ્ય આયોજન કરવામાં આવ્યું છે. મોરબીના કામધેનુ પાર્ટી પ્લોટની બાજુમાં, બાયપાસ રોડ, મોરબી ખાતેના વિશાળ મેદાનમાં આજ તા. 2 સપ્ટેમ્બરથી તા. 24 સપ્ટેમ્બર સુધી આ લોકમેળો યોજાશે. ખાસ વાત એ છે કે સામાન્ય અને મધ્યમવર્ગીય પરિવાર પણ કોઈ આર્થિક ભાર વગર મેળાની મુલાકાત લઈ શકે તે માટે મેળામાં પ્રવેશ સંપૂર્ણપણે નિઃશુલ્ક રાખવામાં આવ્યો છે.

યંગ ઇન્ડિયા ગ્રુપ છેલ્લા 17 વર્ષથી મોરબીમાં ‘ક્રિષ્ના લોકમેળા’નું આયોજન કરે છે. વર્ષોથી મોરબીની જનતાના મળતા પ્રેમ, વિશ્વાસ અને સહયોગના કારણે આ મેળો મોરબીવાસીઓ માટે મનોરંજન સાથે પારિવારિક મેળાપનું એક આગવું માધ્યમ બન્યો છે. આ વર્ષે પણ બાળકો, બહેનો, યુવાનો અને વડીલો સહિત દરેક વયજૂથના લોકો પરિવાર સાથે આવી શકે અને સલામત વાતાવરણમાં સમય વિતાવી શકે તે દિશામાં વિવિધ વ્યવસ્થાઓ ગોઠવવામાં આવી છે.

‘ક્રિષ્ના લોકમેળા’માં બાળકો અને યુવાનો માટે વિવિધ અવનવી તથા આકર્ષક રાઇડ્સ રાખવામાં આવી છે. આ ઉપરાંત મેળામાં ફજેત-ફાળકા, રમકડાં તેમજ વિવિધ મનોરંજનના સાધનો ઉપલબ્ધ રહેશે. પરિવાર સાથે આવતા લોકો માટે સમય પસાર કરી શકાય તેવી અનેકવિધ વ્યવસ્થાઓ મેળાના મેદાનમાં ઉભી કરવામાં આવી છે.

મેળામાં વિવિધ પ્રકારના ખાણી-પીણીના સ્ટોલ પણ રાખવામાં આવ્યા છે. મુલાકાતીઓને ખાણી-પીણીની વસ્તુઓ, રમકડાં તથા અન્ય વસ્તુઓ વ્યાજબી ભાવે મળી રહે તે બાબતે આયોજનકર્તાઓ દ્વારા ખાસ ધ્યાન આપવામાં આવ્યું છે. જેથી પરિવાર સાથે આવતા લોકોને મનોરંજન ઉપરાંત ખરીદી અને ખાણી-પીણીની પણ સુવિધા એક જ સ્થળે મળી રહે.

મેળામાં પ્રવેશ માટે કોઈપણ પ્રકારની એન્ટ્રી ફી લેવામાં આવશે નહીં. યંગ ઇન્ડિયા ગ્રુપ દ્વારા ખાસ કરીને સામાન્ય અને મધ્યમવર્ગીય પરિવારોને ધ્યાનમાં રાખીને આ વ્યવસ્થા કરવામાં આવી છે. પરિવારના તમામ સભ્યો સાથે આવી શકે અને પ્રવેશના ખર્ચની ચિંતા કર્યા વિના મેળાનો આનંદ માણી શકે તે આ આયોજનનો મહત્વનો ઉદ્દેશ છે.

મોટી સંખ્યામાં લોકો એકત્રિત થતા લોકમેળામાં સુરક્ષા વ્યવસ્થા જળવાઈ રહે તે માટે આયોજનકર્તાઓ દ્વારા ખાસ તકેદારી રાખવામાં આવી છે. સમગ્ર મેળા પરિસરમાં CCTV કેમેરા લગાવવામાં આવ્યા છે. ઉપરાંત સિક્યુરિટી ગાર્ડ તથા યંગ ઇન્ડિયા ગ્રુપના સ્વયંસેવકોની ટીમ પણ સતત દેખરેખ રાખશે. ખાસ કરીને બાળકો, બહેનો અને પરિવાર સાથે આવતા મુલાકાતીઓને કોઈ મુશ્કેલી ન પડે તથા મેળાનું વાતાવરણ વ્યવસ્થિત અને સુરક્ષિત રહે તે માટે સુરક્ષા વ્યવસ્થાને મહત્વ આપવામાં આવ્યું છે.