મોરબી નજીકથી લાખોની જાલી નોટ સાથે ઝડપાયેલા આરોપીઓના રિમાન્ડ દરમિયાન એસઓજી ટીમે સીપીયુ, પ્રિન્ટર અને મોનીટર સહિતનો મુદામાલ કબજે લીધો છે અને આરોપીના આજે રિમાન્ડ પૂર્ણ થતા તમામ આરોપીને જેલહવાલે કરવામાં આવનાર છે.
મોરબી એલસીબી ટીમે ખાનગી બાતમીને આધારે એલસીબી ટીમે વોચ ગોઠવતા માળિયા ફાટક નજીકથી પસાર થતા આરોપી હર્ષદભાઈ રજનીકાન્તભાઈ દીવાણી રહે. વાવડી રોડ મોરબી, ગોવિંદભાઈ હરજીભાઈ મહેશ્વરી રહે. ભારાપર તા. અબડાસા જી ભુજ, મયુર હરિપ્રસાદ નિમાવત રહે. રીલીફનગર મોરબી અને ઇમરાન કરીમ સંધવાણી રહે. જુના દેવળિયા તા. હળવદ વાળાને ઝડપી લઈને તેની પાસે રહેલી ભારતીય બનાવટની જાલી ચલણી નોટો ૨૦૦૦ ના દરની ૧૩૮ નંગ રૂ. ૨,૭૬,૦૦૦ , ૫૦૦ ના દરની નોટ નંગ ૪૮૨ રૂ. ૨,૪૧,૦૦૦ અને ૧૦૦ ના દરની ૮૩ નોટ રૂ. ૮૩૦૦ મળીને કુલ ૭૦૩ નંગ નોટ રૂ. ૫,૨૫,૩૦૦ નો મુદામાલ ઝડપી લેવામાં સફળતા મળી છે. જે જાલી નોટકાંડ મામલે વધુ તપાસ એસઓજી ટીમને સોપવામાં આવી હોય, એસઓજી ટીમે ચારેય આરોપીને ૧૦ દિવસના રિમાન્ડની માંગણી સાથે કોર્ટમાં રજુ કરતા ચારેય આરોપીના ચાર દિવસના રિમાન્ડ મંજુર કરવામાં આવ્યા હતા જે રિમાન્ડ દરમિયાન ચલણી નોટોની ઝેરોક્ષ કરી હતી તે સીપીયુ, પ્રિન્ટર સહિતનો મુદામાલ એસઓજી ટીમે કચ્છમાં દરોડા કરીને જપ્ત કર્યો હતો તે ઉપરાંત આરોપીઓએ આપેલી કબુલાતને આધારે કેટલાક પેટ્રોલપંપમાં નકલી નોટો ચલાવી હતી તે નોટો પણ એસઓજી ટીમે કબજે લીધી છે. તમામ મુદામાલ રીકવર કરવામાં એસઓજી ટીમને સફળતા મળી હોય, આજે ગુરુવારે આરોપીઓના રિમાન્ડ પૂર્ણ થતા વધુ રિમાન્ડની માંગ નહિ કરીને ચારેય આરોપીને જેલહવાલે કરવામાં આવશે તેવી માહિતી એસઓજીના આધારભૂત સુત્રો પાસેથી પ્રાપ્ત થઈ છે.
