મોરબી તાલુકાના ગ્રામ્ય વિસ્તારમાં ગામની સીમમાં ચોરી અને લૂંટના ઈરાદે ત્રાટકીને ખેતમજૂર મહિલાઓ પર દુષ્કર્મ આચરવાના બે ગંભીર બનાવોનો મોરબી એલસીબી પોલીસે ભેદ ઉકેલી નાખ્યો છે. પોલીસે આ જઘન્ય અપરાધ આચરનારી હળવદ પંથકની દેવીપૂજક ગેંગના 3 શખ્સો અને 1 કાયદાના સંઘર્ષમાં આવેલ બાળ કિશોરને ઝડપી પાડી કાયદેસરની કાર્યવાહી હાથ ધરી છે.
બનાવની મળતી વિગત મુજબ ગત તારીખ 04 ના રોજ રાત્રિના 10:30 વાગ્યાના અરસામાં મોરબી તાલુકાના ગામની સીમમાં આવેલ વાડીમાં 5 અજાણ્યા શખ્સો ચોરી અને લૂંટના ઈરાદે આવ્યા હતા. ખેતમજૂરો જાગતા હોવાથી તેઓએ એક છોકરી ગોતવા આવ્યા હોવાનું બહાનું કાઢ્યું હતું. ત્યારબાદ ખેતમજૂર મહિલાના પતિને ગળે છરી રાખી, 1 શખ્સે પરિણીતા પર છરીની અણીએ બળજબરીથી દુષ્કર્મ આચર્યું હતું. તો બીજા બનાવમાં તારીખ 05 ના રોજ રાત્રિના 2 વાગ્યાની આસપાસ મોરબી તાલુકાના અન્ય એક ગામની સીમમાં બન્યો હતો. આ બનાવમાં પણ 5 શખ્સો છરી અને ધોકા જેવા હથિયારો સાથે ધાબા પર સૂતેલા મજૂરો પાસે ગયા હતા. તેઓને મારી નાખવાનો ભય બતાવી સોના-ચાંદીના દાગીના માંગ્યા હતા. મજૂરો પાસે દાગીના ન હોવાનું જણાતા, 5 પૈકી 3 શખ્સોએ મહિલાના પતિની નજર સામે જ પરિણીતા પર સામુહિક દુષ્કર્મ આચરી જાનથી મારી નાખવાની ધમકી આપી હતી.
આ વણશોધાયેલ અને ગંભીર ગુનાઓને પગલે આઈજી ચિરાગ કોરડીયા અને એસપી મુકેશ પટેલની સૂચનાથી એલસીબી પીઆઈ આર.સી.ગોહિલના માર્ગદર્શન હેઠળ એલસીબી, પેરોલ ફર્લો સ્ક્વોડ અને તાલુકા પોલીસની અલગ-અલગ ટીમો બનાવવામાં આવી હતી. તપાસ દરમિયાન બાતમી મળી હતી કે આ ગુનાઓ આચરવામાં હળવદ તાલુકાના માથક અને કડીયાણા ગામની દેવીપૂજક ગેંગનો હાથ છે. જેના આધારે પોલીસે કડીયાણા ગામેથી આરોપીઓને દબોચી લીધા હતા જેમાં પકડાયેલ આરોપીઓ નવઘણભાઈ કાળુભાઈ વાઘેલા (ઉ.વ. 21, રહે. કડીયાણા, તા. હળવદ),દિલીપ ઉર્ફે દિપો કેશાભાઈ વાજેલીયા (ઉ.વ. 20, રહે. કડીયાણા, તા. હળવદ),મુન્નાભાઈ ગંગારામભાઈ વાજેલીયા (ઉ.વ. 23, રહે. કડીયાણા, તા. હળવદ) અને કાયદાના સંઘર્ષમાં આવેલ 1 બાળ કિશોર (રહે. કડીયાણા, તા. હળવદ) તેમજ એક આરોપી દિનેશભાઈ મધુભાઈ જખાનીયા (રહે. માથક, તા. હળવદ) જેને ઝડપવા માટે કાર્યવાહી હાથ ધરવામાં આવી છે
પોલીસે આરોપીઓ પાસેથી 4 મોબાઈલ ફોન (કિંમત રૂ. 20000) અને 1 મોટરસાયકલ (કિંમત રૂ. 30000) મળી કુલ રૂ. 50000 નો મુદ્દામાલ કબજે કર્યો છે. આ આરોપીઓ રાત્રિના સમયે અવાવરું જગ્યાએ ખેતરમાં એકલ-દોકલ રહેતા મજૂરોને નિશાન બનાવી લૂંટ કરતા અને મહિલાઓ હાજર હોય તો સામુહિક દુષ્કર્મ આચરવાની ટેવવાળા હોવાનું સામે આવ્યું છે. આરોપી નવઘણ અને દિલીપ વિરુદ્ધ અગાઉ પણ હળવદ પોલીસ મથકમાં ગુનાઓ નોંધાયેલા છે.
આ બનાવોને ધ્યાને લઈ મોરબી પોલીસે ખેડૂતો અને વાડી માલિકોને અપીલ કરી છે કે પરપ્રાંતીય મજૂરો માટે મજબૂત દરવાજાવાળા મકાનની વ્યવસ્થા કરવી અને સુરક્ષા માટે સીસીટીવી કેમેરા લગાવવા. રાત્રિના સમયે મજૂરોએ દાગીના કે મોટી રોકડ સાથે ન રાખવી. વિશેષ કરીને મહિલા મજૂરોની સલામતી માટે રાત્રિ રોકાણ ગામની હદમાં કે લોકો વચ્ચે રહેવાની વ્યવસ્થા કરાવવી જેથી આવા ગુનાઓ અટકાવી શકાય.
આ કામગીરીમાં એલસીબી ઈન્ચાર્જ પીઆઈ આર.સી.ગોહિલ, મોરબી તાલુકા પીઆઈ એન.એસ.ઘેટીયા, એલસીબી પીએસઆઈ બી.ડી.ભટ્ટ, પેરોલ ફર્લો પીએસઆઈ વી.જી.માલાણી સહિત એલસીબી, પેરોલ ફર્લો અને તાલુકા સર્વેલન્સ સ્ટાફના જવાનો જોડાયા હતા.